HOME | INFO | -> NEWS <- | DOSSIER | TERMINE / BACHECA |
KIOSK / EDICOLA | LADINBalsan, 28 de jené 2008
Le guern de Romano Prodi é tomé - por le
desplajëi de tröc che s'â aodé por la
Talia n guern dla toleranza zivila. Les previjiuns va dl vers de
lites tomperìes. Tla discusciun sön la situaziun
politica atuala, mo ince bele tles discusciuns denant á la
SVP tres indô dit che la lege litala ne po nia avëi n
lim lital por les mendranzes. N lim lital, insciö la SVP, i
fajess tort ales mendranzes, deache les mendranzes ne podess te
chësc cajo nia rové tl parlamënt con partis
autonoms.
I esponënc dla SVP à rajun. Mo ai scuta düc canc
sön la gran contradiziun: Deperpo che la SVP se para a Roma
cuntra n limo lital, ô le partì a Balsan mëte
sö n limo lital. La proposta por na lege litala che la SVP
à metü dant te chësta legislatöra se damana
n limo lital. Ciodí che n limo lital sides a Roma cuntra
les rajuns dla mendranza, a Balsan indere nia, n'á le
partì de maioranza mai ciamó splighé. N limo
lital slüjess fora i mendri partis dal consëi
provinzial; n limo lital foss porchël na proibiziun de fat
de partis auotonoms dla mendranza ladina. La proibiziun de partis
- anfat con ci formulaziun che an l'arjunjes - ne fej sogü
nia pert dl repertor democratich, tan manco dles mosöres de
sconanza dles mendranzes. La proposta dla SVP da mëte
sö n limo lital por le consëi provinzial é tan
plü da critiché y da dodé deache l'istanza
plü alta dl stat talian á bele refodé y
anulé le limo sciöche antiminoritar.
Defat, dl 1998 â la SVP splundré tres n limo lital
tl consëi regional. Nia n'â joé les propostes
de müdaziun dl aconsiadù ladin, che s'â
damané eceziuns por la mendranza ladina, eceziuns co
é dötes gnüdes refodades (chisc dis se damana i
esponënc dla SVP rodunt eceziuns por la mendranza
todëscia). L'aconsiadù Carlo Willeit á dak
1998 porchël fat recurs ala Curt costituzionala a Roma, che
i à dé rajun a Willeit: la Curt costituzionala
à anulé la lege litala deplëgn, deache le limo
va cuntra les rajuns fondamentales dla mendranza ladina.
Impò à la SVP te söa ultima proposta por na
lege litala a Balsan indô preodü n limo. Insciö
án ofizial, fosch sön blanch: can ch'ara va dles
rajuns dla mendranza ladina, n'ô le partí de
maioranza respeté gnanca les rajuns scrites dant dala
costituziun. Na bela testimonianza de tan che la mendranza ladina
val veramënter.